लातूर :- (प्रतिनिधी):- पोलिसांकडून पुन्हा एकदा एमआयडीसी परिसरात गुटखा बनविणाऱ्या कारखान्यावर धाड टाकून 44 लाखापेक्षा जास्त मुद्देमाल हस्तगत करण्यात आला आहे.
मागील आठवड्यात अतिरिक्त एमआयडीसी परिसरात लातूर पोलिसांकडून गुटखा बनविणाऱ्या कारखान्यावर धाड टाकून ३ कोटी रुपया पेक्षा जास्त किमतीचा गुटखा व गुटखा बनविण्याचे साहित्य असा मुद्देमाल जप्त करण्यात आला होता.
एमआयडीसी पोलिसांना गोपनीय मिळालेल्या माहितीच्या आधारे लातूर अतिरिक्त एमआयडीसी परिसरातील राहुल कोल्ड्रिंक्स, प्लॉट नंबर 148 या गोडाऊन वर दिनांक ०७ जून २०२४ रोजी छापा टाकला असता शासन प्रतिबंधित गुटखा व गुटखा तयार करण्याचे साहित्य असे ४४,२२,६७८/- (४४लाख २२ हजार ७६८ रुपये) रुपये किमतीचा मुद्देमाल ताब्यात घेण्यात आला आहे.
सदर प्रकरणी यातील आरोपी नामे १) विजय केंद्रे, २) जयपाल जाधव, ३) बाळासाहेब वाघमारे, ४) मल्हारी मजगे आणि ५) अर्जुन केदार यांचे विरुद्ध एमआयडीसी पोलीस स्टेशन लातूर येथे गुन्हा दाखल करण्याची प्रक्रिया चालू आहे.
सदर प्रकरणी श्री सोमय मुंडे, पोलीस अधीक्षक, लातूर, श्री अजय देवरे, अपर पोलीस अधीक्षक, लातूर, श्री भागवत फुंदे, उपविभागीय पोलिस अधिकारी, लातूर शहर यांचे मार्गदर्शनात एमआयडीसी पोलीस स्टेशनचे पोलीस निरीक्षक श्री एस डी नरवाडे, पोलीस उपनिरीक्षक श्री कराड, सहाय्यक फौजदार श्री जगताप, पोलीस हवालदार पिस्तुलकर, पोलीस हवालदार देशमुख, पोलीस नाईक भोसले, गाडे पोलीस अंमलदार दळवे व चालक पोलीस अंमलदार जाधव यांनी सदरची उल्लेखनीय कामगिरी बजावली आहे.
