धाराशिव दि.11 (प्रतिनिधी):- जिल्हयातील उत्कृष्ट क्रीडा खेळाडू व गुणवंत क्रीडा मार्गदर्शक यांच्या क्रीडा क्षेत्रातील योगदानाचे मूल्यमापन होऊन त्यांचा गौरव व्हावा तसेच त्यांना प्रोत्साहन मिळावे या उद्देशाने जिल्हयातील खेळाडू व क्रीडा मार्गदर्शक यांच्याकरीता शासनाकडून जिल्हा क्रीडा पुरस्कार दिला जातो.या वर्षी जिल्हयातुन पुढीलप्रमाणे चार पुरस्कार देण्यात येणार आहेत.1) गुणवंत क्रीडा मार्गदर्शक (1) 2) गुणवंत खेळाडू ( 1 महिला- 1 पुरुष व 1 दिव्यांग खेळाडू) या पुरस्कारासाठी 1 जुलै ते 30 जून या कालावधीसाठी मागील पाच वर्षाची कामगिरी विचारत घेतली जाईल.
जिल्हा क्रीडा पुरस्कारासाठी अर्ज करणा-या अर्जदाराचे त्या जिल्हयात किमान 15 वर्ष वास्तव्य असावे.क्रीडा मार्गदर्शक म्हणून सतत दहा वर्ष महाराष्ट्रात क्रीडा मार्गदर्शनाचे कार्य केले असले पाहिजे व त्याने वयाची 35 वर्ष पुर्ण केली असणे आवश्यक आहे. खेळाडूने पुरस्कार वर्षासह लगतपूर्व 5 (पाच) वर्षापैकी 2 (दोन) वर्षे त्या जिल्हयाचे मान्यता प्राप्त खेळाच्या अधिकृत स्पर्धेमध्ये प्रतिनिधीत्व केले असले पाहिजे.
क्रीडा मार्गदर्शकासाठी गेल्या दहा वर्षात किमान वरिष्ठ गटातील राज्य व राष्ट्रीय पदक विजेते तसेच कनिष्ठ शालेय,ग्रामीण व महिला (खेलो इंडिया) मधील राष्ट्रीयस्तरापर्यतचे पदक विजेते खेळाडू तयार केले असतील असे क्रीडा मार्गदर्शक अर्ज करण्यास पात्र राहतील.सांघिक अथवा वैयक्तिक मान्यता प्राप्त क्रीडा प्रकारात नॅशनल गेम्स,वरीष्ठ राष्ट्रीय अजिंक्यपद स्पर्धेत प्रतिनिधीत्व केलेला खेळाडू अथवा राज्य/जिल्हा अजिंक्यपद स्पर्धेत प्रथम तीन क्रमांकापर्यत यश मिळविणारे किमान तीन खेळाडू घडविणारा मार्गदर्शक विहीत नमुन्यातील अर्ज संघटनेमार्फत अथवा वैयक्तिकरित्या मुदतीत सादर करणे आवश्यक राहील.
तरी संबंधितांनी अधिक माहितीसाठी जिल्हा क्रीडा अधिकारी कार्यालय, धाराशिव यांच्याशी संपर्क साधून विहीत नमुन्यातील अर्ज 31 डिसेंबर, 2024 पर्यत परिपूर्ण प्रस्ताव जिल्हा क्रीडा अधिकारी कार्यालय,श्री.तुळजाभवानी जिल्हा स्टेडियम,धाराशिव येथे कार्यालयीन वेळेत सादर करावे.असे आवाहन जिल्हा क्रीडा अधिकारी श्रीकांत हरनाळे यांनी केले आहे.
